വൈപ്പിനിലെ തീവ്രവാദികളെ കുറിച്ച് അറിയേണ്ടതെല്ലാം

റോഷൻ പിഎം 

തീവ്രവാദികള്‍ വെള്ളത്താല്‍ ചുറ്റപ്പെട്ടു കിടക്കുന്നു, പക്ഷെ കുടിവെള്ളം കിട്ടാന്‍ ബുദ്ധിമുട്ടാണ്. കിണറ് കുത്തിയാല്‍ ഉപ്പുവെള്ളമാണ് കിട്ടുക. ഇവിടെ വര്‍ഷങ്ങളായി പൈപ്പ് കണക്ഷന്‍ അനുവദിക്കുന്നില്ല. പൊതുടാപ്പുകളാണ് കുടിവെള്ളത്തിനായി ആശ്രയിക്കുന്നതു. പകല്‍ സമയത്ത് അതില്‍ വെള്ളം വരാറില്ല. ആലുവയില്‍ നിന്നും ഞാറക്കല്‍ വരെയുള്ള ജനങ്ങള്‍ ഉറങ്ങുമ്പോഴാണ് ഈ ഭാഗത്തെ ടാപ്പുകളില്‍ വെള്ളം വന്നു തുടങ്ങുക. അതുകൊണ്ട് പാതിരാത്രി റോഡ്‌ വക്കില്‍ ക്യൂ നിന്നു കുടത്തില്‍ കുടിവെള്ളം ശേഖരിക്കണം. ടാങ്കറില്‍ വെള്ളം എത്തിച്ചു തരാറുണ്ട്, അതിനും പാത്രവുമായി ക്യൂ നില്‍ക്കണം.

ടാങ്കറുകള്‍ കുടിവെള്ള വിതരണത്തിനിടയിലുള്ള ഒഴിവു സമയങ്ങളില്‍ സെപ്ടിക്ക് ടാങ്ക് മാലിന്യം കയറ്റിയ സംഭവങ്ങള്‍ വരെ ഉണ്ടായിട്ടുണ്ട്. പുതുവൈപ്പില്‍ നിന്നും നോക്കിയാല്‍ ഹൈക്കോടതി കാണാം. എറണാകുളം നഗരത്തിലെ ഏറ്റവും കേമപ്പെട്ട ഫ്ലാറ്റുകള്‍, ഷോപ്പിങ്ങ് സെന്‍ററുകള്‍, താജ് ഹോട്ടലുകള്‍ ഇവയൊക്കെ തീവ്രവാദികളുടെ കാഴ്ച്ചവട്ടത്തിലുണ്ട്. കുടിവെള്ളത്തിനു ക്യൂ നില്‍ക്കുന്ന തീവ്രവാദികള്‍ക്കു ഈ നഗര കാഴ്ച്ചകള്‍ ഒരു ആശ്വാസമാണ്. അനാദികാലം മുതല്‍ കുടിവെള്ളത്തിന്‍റെ പേരില്‍ വൈപ്പിനിലെ തീവ്രവാദികള്‍ നടത്തിയ ആക്രമണത്തില്‍ കോടിക്കണക്കിനു മനുഷ്യരാണ് മരിച്ചു വീണിട്ടുള്ളത്.

വൈപ്പിനിലെ തീവ്രവാദികളുടെ വീട്ടില്‍ നിന്നും അഞ്ചാറു മൈല്‍ റേഡിയല്‍ ഡിസ്റ്റന്‍സില്‍ കേരളത്തിലെ മികച്ച ആശുപത്രികള്‍ പലതുമുണ്ട്. കുറച്ചുകാലം ആയിട്ടേയുള്ളൂ ഗോശ്രീ പാലം വന്നിട്ടു. അതിനു മുന്‍പ്, രാത്രി ആര്‍ക്കെങ്കിലും അടിയന്തിരമായി വൈദ്യ സഹായം വേണ്ടി വന്നാല്‍ പാതാളം വഴി കറങ്ങി ഏറണാകുളത്തു എത്തണം. പകല്‍ ആണെങ്കില്‍ ജങ്കാര്‍ സര്‍വ്വീസ് ഉപയോഗിക്കാം, അപ്പോഴും അപ്പുറത്തെത്താന്‍ അര മണിക്കൂര്‍ ഏറ്റവും ചുരുങ്ങിയതെടുക്കും. തീവ്രവാദികള്‍ ഗോശ്രീ പാലത്തിനു വേണ്ടി ആക്രമങ്ങള്‍ അഴിച്ചു വിട്ടു. ആശുപത്രികളില്‍ ബോംബ്‌ വെച്ചു, ജങ്കാറും ബോട്ടുമൊക്കെ കായലില്‍ താഴ്ത്തി.

പാലത്തിനെതിരെ സമരം ചെയ്യാന്‍ ജേക്കബ് വടക്കുഞ്ചേരി പോലുള്ള ഗാന്ധ്യന്മാര്‍ ഉണ്ടായിരുന്നു. തീവ്രവാദികള്‍ അവരുടെ കയ്യും കാലും അറുത്തുമാറ്റി. അങ്ങിനെ പതിറ്റാണ്ടുകള്‍ നീണ്ട തീവ്രവാദി ആക്രമണങ്ങള്‍ക്ക് ശേഷം ഗോശ്രീ പാലം യാദാര്‍ത്ഥ്യമായി. പാലം വരാന്‍ പതിറ്റാണ്ടുകള്‍ എടുത്തെങ്കിലും പാലത്തിനിടയില്‍ കണ്ടെയിനര്‍ ടെര്‍മിനല്‍ ടപ്പേന്നു വന്നു. അതോടെ തീവ്രവാദികള്‍ക്ക് കണ്ടെയിനറുകള്‍ക്ക് മുട്ടില്ലാതായി. സദാ ട്രാഫിക്ക് ബ്ലോക്കും, പൊടിപടലം നിറഞ്ഞ അന്തരീക്ഷവും. എന്തുകൊണ്ടും തീവ്രവാദികള്‍ക്ക് പറ്റിയ അന്തരീക്ഷം.
.
വര്‍ഷാവര്‍ഷം വൈപ്പിനില്‍ നിന്നും തുടങ്ങുന്ന റോഡു പണി മുനമ്പത്ത് എത്തുമ്പോഴേക്കും, വൈപ്പിനിലെ റോഡുകള്‍ പൊളിഞ്ഞിട്ടുണ്ടാവും. അടുത്ത ആറുമാസം കുഴിയില്‍ മണ്ണിടുന്ന മെയിന്റ്റന്‍സുകളുടെ കാലമാണ്. ഇതായിരുന്നു വര്‍ഷങ്ങളോളം വൈപ്പിനിലെ ആകെയുള്ള ഒരു റോഡിന്‍റെ അവസ്ഥ. പതിവുപോലെ തീവ്രവാദികള്‍ ഹൈക്കോര്‍ട്ടില്‍ ഹൈഡ്രജന്‍ ബോംബിട്ടു. പേടിച്ചരണ്ട ഹൈക്കോടതി അവരുടെ നേരിട്ടുള്ള മേല്‍നോട്ടത്തില്‍ റോഡ്‌ പണിതു. അതോടെ റോഡില്‍ വാഴകൃഷി നടത്തിയിരുന്ന കര്‍ഷകര്‍ വഴിയാധാരമായി. കൊതുകിനെതിരെയും വന്‍തോതിലുള്ള ആക്രമണങ്ങളാണ് കാലങ്ങളായി തീവ്രവാദികള്‍ നടത്തി കൊണ്ടിരിക്കുന്നത്. തീവ്രവാദികളിലെ വിദേശ സാന്നിധ്യവും എടുത്തു പറയേണ്ടതാണ്.

കുളച്ചലില്‍ നിന്നും ബോട്ട് പണിക്കായി വന്നു ഇവിടത്തുകാരായി മാറിയ വലിയൊരു വിഭാഗം തീവ്രവാദികള്‍ ഉണ്ടു. കൂടാതെ കൊച്ചി മട്ടാഞ്ചേരി ഭാഗങ്ങളില്‍ നിന്നും കുടിയേറിയ വിദേശ തീവ്രവാദികള്‍ വേറെ. തീവ്രവാദികള്‍ കൂട്ടംകൂടിയേ താമസിക്കൂ. സര്‍ക്കാര്‍ അഞ്ചേക്കര്‍ ഭൂമിയും ബംഗ്ലാവും പണിതു കൊടുത്താലും, തീവ്രവാദികള്‍ മുട്ടിമുട്ടി നില്‍ക്കുന്ന ഒറ്റമുറി വീടുകളില്‍ തിങ്ങിപ്പാര്‍ക്കാനാണ് താല്‍പ്പര്യപ്പെടുന്നത്. കണ്ടെയിനര്‍ ടെര്‍മിനലില്‍ ജോലി കൊടുത്താലും അവര്‍ക്ക്‌ മീന്‍ പിടിക്കാന്‍ പോവുന്നതാണ് ഇഷ്ടം. ഒട്ടും വിഭിന്നമല്ല കുഞ്ഞുതീവ്രവാദികളുടെ കാര്യവും. വൃത്തിയുള്ള വസ്ത്രങ്ങള്‍, ആഹാരം, സ്കൂള്‍ ഇതൊന്നും തീവ്രവാദി കുഞ്ഞുങ്ങള്‍ക്ക് പഥ്യമല്ല. ഈ തീവ്രവാദികളുടെ ഒരു കാര്യം! പറയാനാണെങ്കില്‍ ഇനിയും ഒരു പാടുണ്ട്, തല്‍ക്കാലം ഇതുമതി.

ലേഖകൻ തന്റെ ഫേസ്‌ബുക്കിൽ എഴുതിയതാണ് പ്രസ്തുതകുറിപ്പ്

Be the first to comment on "വൈപ്പിനിലെ തീവ്രവാദികളെ കുറിച്ച് അറിയേണ്ടതെല്ലാം"

Leave a comment

Your email address will not be published.


*