സംഗീതജ്ഞനും സാമൂഹ്യ പ്രവർത്തകനുമായ എ എസ് അജിത് കുമാറിന്റെ ആദ്യ പുസ്തകമായ ‘കേൾക്കാത്ത ശബ്‌ദങ്ങൾ : പാട്ട്, ശരീരം, ജാതി’ പുറത്തിറങ്ങി. കോഴിക്കോട് അദർ ബുക്‌സ് പ്രസിദ്ധീകരിച്ച കൃതിയുടെ മുഖവില നൂറ്റമ്പത് രൂപയാണ്. സംഗീതം ,ശബ്ദം എന്നിവയെ കുറിച്ചുള്ള അജിത് കുമാർ എ എസിന്റെ ലേഖനങ്ങളുടെ സമാഹാരമാണ് ‘ കേൾക്കാത്ത ശബ്ദങ്ങൾ’

കാഴ്ചയുടെ ശീലങ്ങൾ, പ്രത്യേകിച്ച് സിനിമ, മലയാളത്തിൽ ഒട്ടേറെ ചർച്ച ചെയ്യപ്പെടാറുണ്ട്. എന്നാൽ കേൾവിയുടെ സംസ്കാര രാഷ്ട്രീയത്തെ കുറിച്ചുള്ള സംവാദങ്ങൾ തീരെ കുറവാണ്. ഈ വിടവിനെയാണ് അജിത് കുമാറിന്റെ എഴുത്ത് സൂക്ഷ്മവും നിശിതവുമായി നേരിടുന്നത്. സാമാന്യബോധമായി നമ്മൾ കാണുന്ന – അല്ല, കേൾക്കുന്ന – പലതിനെയും ഈ പുസ്തകം ഇഴപിരിച്ച് വിവിധ ട്രാക്കുകളിൽ അനുഭവവേദ്യമാക്കിത്തരുന്നു.

തിരുവനന്തപുരം സ്വദേശിയായ അജിത് കുമാറിന്റെ സംഗീതത്തിലെ ജാതിയെ കുറിച്ചുള്ള ‘3 ഡി സ്റ്റീരിയൊ കാസ്റ്റ് ‘(2012) എന്ന ഡോക്യുമെന്ററി ഏറെ ചർച്ച ചെയ്യപ്പെട്ടിട്ടുണ്ട്. ലീന മണിമേഖലയുടെ “വൈറ്റ് വാന്‍ സ്റോറീസ് ” (2013) കെ ആര്‍ മനോജിന്റെ “എ പെസ്റ്റെറിംഗ് ജേര്‍ണി’ (2010) എന്നീ ഡോക്യുമെന്റികളുടെ പശ്ചാത്തല സംഗീതം ചെയ്‌തിട്ടുണ്ട്‌. ദളിത് രാഷ്ട്രീയം, കല, പോപ്പുലര്‍ സംസ്കാരം, സംഗീതം എന്നിവയെ സംബന്ധിച്ച് ശ്രേദ്ധേയമായ ലേഖനങ്ങള്‍ ആനുകാലികങ്ങളിലും ഓൺലൈൻ ഇടങ്ങളിലും പ്രസിദ്ധീകരിച്ചിട്ടുണ്ട്.